aenigmata

[Medicus domesticus]

Medicus Conso suo s.d.p.

E nartatione recens (nartavi cum liberis meis) puto te in regione austriaca fuisse nomine "Salzkammergut". In illa regione amoena multi lacus sunt, quos novi.
Tune visitavisti lacum nomine "Wolfgangsee"

Vale
[E montibus Bavariensibus nivibus obrutis ]

[Tiberis]

Tiberis Conso ex Alpibus feliciter reverso s.d.p.

nonne agitur de lacu quodam Styriaco prope vicum Altaussee sito (Altausseer See), in cuius litore monumentum Richardi Strauss invenitur, qui , cum his locis commoraretur, ad modos "symphoniae Alpinae" faciendos adductus esse dicitur?
http://picasaweb.google.at/Gerd.Froemmel/ALTAUSSEERSEERUNDWANDERWEG#5370270152832376834

[consus]

Consus Medico Domestico et Tiberi amicis suis illustrissimis sal.
Ita est ut Tiberis noster scripsit. Gratulor. Cum in illa regione paucos dies feliciter versaremur, imprimis propinquos visitavimus. Qui non solum ad illum lacum et Viam Salis nos duxerunt, sed etiam ad sepulcrum uxoris Nicolai Mariae Brandauer…
Valete. III Kal. Feb.

[Tiberis]

Tiberis amicis suis s.d.p.

ecce novum denique aenigma, scilicet iterum - ignoscite, ignoscite - ad musicam pertinens..

Annorum puer undecim audientes
Miranda stupefecit arte Russos.
Cui plus notitiae ferunt dedisse
Universa opera illa Sergiana.
Quae ille tam ingeniose et eleganter
Dicitur modulatus esse , ut ipse
Iudex plauderet inclutus gravisque.
Nunc Helvetia gloriatur illo.

de quo agitur?

[consus]

Consus Tiberi suo sal.
Quamquam fateor me iactari dubitatione, tamen cuiusdam memor proverbii confidenter virilique animo audeo scribere: Eugenius Kissin clavicymbalista.
Optime vale.

[Tiberis]

salve, mi Conse!

vehementer doleo, quod erras; tamen non procul es solutione recta. ad quam investigandam respice, quaeso, praecipue haec:
Annorum puer undecim audientes
Miranda stupefecit arte Russos.
Cui plus notitiae ferunt dedisse
Universa opera illa Sergiana.
Quae ille tam ingeniose et eleganter
Dicitur modulatus esse , ut ipse
Iudex plauderet inclutus gravisque.
Nunc Helvetia gloriatur illo.

agedum, mi amice!

[Medicus domesticus]

Salve Tiberis artis musicae perite!
Estne nomen artificis musici "Grigory Sokolow" ?

Optime vale!

[consus]

Consus Tiberi suo s.d.p.
Permulti quidem sunt clavicymbalistae Russi, sed quod ad aenigma tuum pertinet, Andrei Wladimirowitsch Gawrilow nomen videtur eius esse viri, de quo illos condidisti versus. Vivit enim in Helvetia omniaque opera Sergii Rachmaninovi est interpretatus.
Bene vale. Non. Feb. Ex Rhenania nivibus feliciter liberata.

[Tiberis]

salve Medice !
heu - et tu in errore versaris, amice. nam et Gregorium Sokolow - quem modulantem numquam me audisse fateor - "universa opera Sergiana" (ad clavicymbalum scilicet pertinentia) non modulatum esse puto; praeterea non in Helvetia vivit, ni fallor.
sed ut minus difficultatis sit in hoc aenigmate solvendo, haec addo: artifex ille, qui vobis indagandus est, symphonias quoque Ludovici van Beethoven (scil. a Francisco Liszt transscriptas) ingeniosissime solet modulari...

[Tiberis]

Tiberis Conso suo s.d.p.

pro dolor! quod attinet ad Andream Gawrilow, iterum falleris. qui num puer XI annorum iam auditores stupefecit? deinde dubito, num universa Rachmaninovi opera ad clavicymbalum pertinentia interpretatus sit. sed verbis, quae supra addidi, lectis virum quaesitum facile invenies.

[consus]

Bene, mi Tiberis! Nonne ergo est Константин Щербаков?

[Tiberis]

optime, mi Conse! gratulor!
Constantinum Scerbakow nonnullis mensibus ante ipse audivi symphoniam IX. Beethovenianam interpretantem. quid plura? arte eius excellentissima valde eram commotus.

optime vale!

[consus]

Nomen id est teli, sed virginis est quoque nomen:

Missile morte micat, virgo sed ore rubet.

Quod telum, amici?

[Tiberis]

salve, Conse !

exercitus Iranianus missilibus quibusdam utitur, quibus nomen Noor (id est lux). nonne Noor sive Nur praenomen quoque muliebre est ? (memini reginae cuiusdam Iordaniae).

[Zythophilus]

SALVE
In Secundo Bello milites Russi quibusdam machinis ad tela mittenda usi sunt, quibus nomen "Katyusha" (http://de.wikipedia.org/wiki/Katjuscha_(Raketenwerfer))erat. Nostris autem temporibus eodem nomine potius tela ipsa appellantur, quibus homines nefarii utuntur. Ideo non est dubium, quin nomen puellae etiam sit nomen teli, quamquam, utrum tu, optime Conse, hac de re locutus sis necne, nescio.
VALE