aenigmata

[Tiberis]

Tiberis Conso suo sal.d.p.

primo aspectu de Prometheo rupi alligato cogitavi..
nonne versui, ut integer sit, haec verba inseri oportet:
ecce vigil, satus Iapeti de stirpe, Prometheus
sed fateor me incertissimum esse..

[consus]

Iapetionides !!! - Excellentissime nomina indagasti, optime Tiberis. Laeto gaudium testor plausu . Disticha illa composuit Hermannus Weller, poeta Germanus (Carmina Latina, secunda editio aucta, Tubingae MCMXLVI, p. 113).
Iubeo bene te valere.

[Tiberis]

Tiberis amicis suis sal.


rupes imminet alta loco: monachi coluere

aedibus his quondam, nunc peregrini adeunt.

innumeras volucres saxi se condere cernis

rimis , quas circum turba volat strepitans .

limpidaque hic montanis faucibus effluit unda

fluminis ingentis cyanei ac gelidi.

ubi ?
nomen aedium ?
nomen fluminis ?

[consus]

O di immortales! Tot enim tamque clara, mi Tiberis, in orbe terrarum sunt monasteria rupibus adhaerentia, ut de aenigmate solvendo paene desperem; sed nescio quomodo rem ad Bulgariam puto pertinere…

[Tiberis]

ne praeter modum, amice, torquearis,
succurram tibi. namque qui colebant,
nostra religione non fuerunt,
hoc quamquam coluere continenti.

[Zythophilus]

Dicta tibi illa puto, quae caelica claustra uocantur.

Graecula templa eadem uox meteora uocat.

[Tiberis]

erras, quod doleo. locum require
longe religione ab orthodoxa
qui distat regionibusque Graecis.

[consus]

In hoc solvendo aenigmate me diu fateor aestuasse, optime amice. Quid ergo? Scripsisti fluvium in illa regione esse ingentem gelidum cyaneum... Quem ego puto esse fluvium qui vocatur glacialem cyaneum, qui haud procul ab oppido Sinensi Datong citato cursu volvit undas. Ibi esse legi etiam Buddhisticum Templum quod dicitur Pensile; rupibus enim rectis praeruptisque quasi infixum videtur esse. Nunc spero...

[Tiberis]

frustra quidem speras, mi optime Conse! tamen te oro, ne hastam immature abicias.
quod attinet ad illum templum Sinense, monasterium (pristinum scilicet!) quaesitum in Europa inveniri memento, cf.
hoc quamquam coluere continenti.
deinde id quoque cogita flumen illud gelidum ex ipsis montis faucibus (!) profluere... (quod prope monasterium fit..)

[Medicus domesticus]

Salve Tiberis,
Spero me hoc aenigma difficile soluturum esse. Est monasterium in Bosnia situm, quod "Derwischkloster" appellatur. Ibi flumen ingens prope monasterium profluit nomine "Buna-Quelle".

Optime vale!

[consus]

Consus Tiberi suo sal.pl.d.
Vehementer doleo, quod verbis "fluminis ... cyanei" perpensis plane neglexi illud "hoc continenti" . Praeterea meminisse me oportebat in animo te semper habere regiones imperii Austro-Hungarici .
Iubeo bene te valere.

[Tiberis]

Tiberis Medico suo s.d.p.

excellentissime solutum, mi Medice ! hoc monasterium prope municipium Blagaj situm a Turcis XVI. saeculo exstructum est. Buna flumen, quod hoc loco "in lucem editur", paucis chiliometris post in Neretvam influit.http://de.wikipedia.org/w/index.php?title=Datei:Tekija_na_vrelu_Bune.jpg&filetimestamp=20080920140601

optime vale!

Praeterea meminisse me oportebat in animo te semper habere regiones imperii Austro-Hungarici

iam bene me cognovisti !

[Medicus domesticus]

Salvete amici aenigmatis Latini!
Ecce novum:

Res quaesita est sita in urbe Europaea, quam vos certe novistis.
Inscriptio Latina inveniri potest supra introitum sive portam.
Quae inscriptio vobis monstrat amoenitatem et dignitatem pristinam loci.
Locum quaesitum hodie custodit Neptunus et IUSTITIA vicina potest videre
eum.
Tres quaestiones:
Nomen loci?
Nomen urbis?
Quae inscriptio?

Valete!

[consus]

Consus Medico Domestico amico suo Bavario s. d. p.
A Iove aequoreo divinaque Iustitia feliciter adiutus hoc ausim scribere:
Nonne agitur de prisco Horto Botanico R. Academiae Monacensis? Cuius porta non solum columnis Doricis, sed etiam hac ornata est inscriptione:
FLORVM DAEDALAE TELLVRIS GENTES DISSITAE
MAXIMILIANI IOS. R. NVMINE CONSOCIATAE MDCCCXII.*
Iubeo bene te valere. IV Kal. Mart.
________________________________
*http://upload.wikimedia.org/wikipedia/commons/2/2b/Alter_Botanischer_Garten_Muenchen_Eingangsportal-1.jpg

[Medicus domesticus]

Medicus Conso philologo doctissimo s.d.p.

Recte invenisti solutionem aenigmatis!
Hortus Botanicus Monachiensis[*]priscus sive antiquus media in urbe situs mihi bene notus est. (medicinae studiosus Monachii eram et saepe ambulabam in illo horto.)

[*]
www.lbv-muenchen.de/Arbeitskreise/Bioto ... garten.htm


Optime vale!