aenigmata

[Medicus domesticus]

Medicus Conso suo s.d.p.

Est vocabulum, quo duae res nominantur ....miliarium.... Non solum est lapis, sed etiam instrumentum plumbeum in balneis villarum situm ad aquam calefaciendam.
Estne solutio aenigmatis tui?

Bonam noctem!

[consus]

Consus Medico suo Domestico sal. pl. d.
Iterum bene aenigma solvisti: Gratulor.
Georges et Lewis&Short duas exhibent voces, quae sola primae syllabae inter se differunt quantitate:
(1) mīliarium columella est in via erecta, qua milia passuum significantur;
(2) mĭliarium Graeci θερμαντῆρα appellabant. Quod vocabulum Latinum a mĭlio ductum esse dicitur.
Contra autem OLD (s. v. mīliarium), quod uno solo lemmate duas illas complectitur voces: vas enim illud columellae simile esse. OLD Forcellinium secutum videtur esse.
Iubeo bene te valere.

[Medicus domesticus]

Salvete amici libenter aenigmata solventes!

Promunturium saxosum, quod excurrit in mare, videtis, qui vos vivitis aetate Augusti. Vir argento copiosus, amicus imperatoris , vos invitavit et vos modo facitis? Gaudetis theatro hortoque, ambulatis in horto et laetamini maris prospectu. Etiam portus parvus est pars loci quaesiti, quem vos,aenigmatores, nunc inveniatis.

Nomen loci?
Nomen viri?

[consus]

... Vir argento copiosus...

O di immortales...
Nonne argentarii erant Ahenobarbi, optime Medice? Qua de causa locum illum puto esse Montem Argentarium (id est Italice Monte Argentario), virum autem Domitium quendam Ahenobarbum.

[Medicus domesticus]

Doleo, qoud erras, conse...etiam Publius Ovidius Naso virum quaesitum novit. (Fasti)
Seneca commemorat virum copiosum et crudelem (De ira), qui erat amicus imperatoris Augusti

[consus]

...Seneca commemorat virum copiosum et crudelem …

Consus Medico suo Domestico s. d. p.
His ipsis verbis clementer additis memoriam statim mihi renovasti Vedii Pollionis, quem virum sane crudelem fuisse Seneca narrat in tertio de Ira (dial. 5, 40, 2sqq.). Nomen ergo loci: Pausilypum, nomen viri: Vedius Pollio.
Iubeo bene te valere. III Id. Mart.

[Medicus domesticus]

Medicus Conso suo s.d.p.

Solutiones duarum quaestionum recte invenisti!
Temporibus nostris ruinae villae Vedii Pollionis et ruinae theatri videri possunt:
http://www.pompeiisites.org/Mediagaller ... ilmato=273
Hic videtis imaginem loci a Conso inventi aetate Augusti [spectate paginam 3]:
http://www.theiss.de/pdf/978-3-8062-2149-7.pdf

Vale

[consus]

Amicis illustrissimis sal.

Est locus in terris: castellum viderat olim,

Sidera sed tangit nunc ibi pila teres.

Haud procul exstructum poteris quoque cernere castrum:

Castalidum est sedes haec nova sacra choro.

Quis locus?
Qua in urbe?

[Tiberis]

heu, nisi qua me iuveris errantem ratione ,

deerit omnis spes consiliumque mihi..

[consus]

Bene, mi Tiberis! Urbi illi et adultero famoso idem scito esse nomen.

[romane]

si noctu nummeri magni videntur, scio urbem locumque

[Tiberis]

Urbi illi et adultero famoso idem scito esse nomen.

tanto auxilio non opus erat, mi Conse. sed urbe cognita scilicet expeditius reliqua inveniuntur.
puto ergo pristinum castrum id esse, quod Francogallice "Bastille" appellatur. haud procul columna quaedam eminet in altum, quae oppugnationi huius castri monumento est. sedes nova Castalidum est theatrum musicum Opéra Bastille appellatum, quod illo die, quo CC annis ante illa oppugnatio facta erat, anno MCMLXXXIX sollemniter inauguratum est.

[consus]

Equidem valde gaudeo, mi optime amice, quod quasi a dearum illo iudice famoso adiutus res obscuras feliciter explicasti; sed quod ad columnam attinet, paullulum erras; est enim Columna quae vocatur Mensis Iulii (Francogallice: Colonne de Juillet). Quo monumemto seditiosi honorantur homines, qui anno MDCCCXXX mense Iulio amisere vitam*.
Lutetia Parisiorum! Urbs est, ad quam Rhenaniae nos incolae Thalye usi et facillime et celerrime pervenire possumus…
________________________________________________
* http://upload.wikimedia.org/wikipedia/commons/c/c5/July_Column_at_Place_de_la_Bastille_-_July_2006.jpg

[Tiberis]

heu, nimis neglegentem me fuisse apparet, ut qui mense Iulio lecto statim de rebus anno MDCCLXXXIX gestis cogitaverim !

[Tiberis]

salvete, amici!

quaeritur urbs quaedam in Europa sita...

alis qua rutilis hostes prohibet basiliscus,

tu, matercula, iter flectis, aquosa, tuum.