aenigmata

[consus]

Fortibus inflammas animum, Sphinx callida, verbis:

At mea mens - doleo - fixa stupore manet.

Nec tamen abiciam iaculum, Sphinx horrida, victus:

Nam pugnare placet: florida palma vocat.

[Tiberis]

Consum, tenacem propositi virum,
nec difficultas maxima nec labor

voracitas nec Sphingis atrox

mente quatit solida minacis.

[consus]

Bene, mi Tiberis! Indice dramatum musicorum inspecto* hoc ausim scribere:
Sergei Sergejewitsch Prokofjew;
Semjon Kotko (op. 81).
Quod opus Moscoviae pr. Kal. Iul. anno MCMXL primum editum esse dicitur.

_______________________________________
* Oper. Eine illustrierte Darstellung der Oper von 1597 bis zur Gegenwart. Wiesbaden 1981, p. 444.

[Tiberis]

Sphinx ad desperationem adducta Oedipo aureo invicto immiti eqs. sal.


me miseram Sphingem,quae iterum sim nunc superata!

Laiades iterum vincere me potuit !

nulla abscondita res exstat, doctissime amice,

quam non invenias tempore, Conse, brevi.

[consus]

...non invenias tempore, Conse, brevi.

Esse nego tanta dignum me - credite! - laude:

Bis tres hercle dies mens agitata meast!

[consus]

Est locus in terris, decorat quem funebre fanum:

Panthei simile est, solis et igne nitet.

Ossa tenet templum sculptoris morte perempti:

Marmoreis signis nos hodieque movet.

Quis? Quid? Ubi?

[Tiberis]

Tiberis Conso suo s.d.p.

iterum interrogata tua ad Antonium Canovam pertinere videntur , qui vivus templum illud designavit, in quo mortui ossa quiescerent (tempio Canoviano, situm in municipio Possagno , in quo sculptor natus erat):
http://de.wikipedia.org/w/index.php?title=Datei:Possagno_Canova-Tempel.png&filetimestamp=20060917094142

[Zythophilus]

SALVETE
Carmine, quo responderem, confecto Tiberim priorem esse uideo.
Delubrum simile nos inuenisse putamus.

Haud procul a Venetis haec sita sacra domus.

Edidit oppidulum sculptorem. Num tenet ossa

idem, qui genuit, candida in aede locus?

Per sua uiuit adhuc simulacra e marmore ducta,

Ingenio iussit uiuere saxa suo.

Dubito quidem, sintne ossa Antonii illo in templo sepulta.
VALETE

[Tiberis]

salve, Zythophile!
quod attinet ad ossa sculptoris, haec in pagina Italica Wikipediae leguntur:
Nella nicchia di sinistra si trova la tomba in cui riposano Antonio Canova e il fratellastro mons. Sartori Canova, Vescovo di Mindo.

[Zythophilus]

Eius apud Venetos uideo cor esse sepultum.

Artificis corpus patria terra tenet.

[consus]

Consus spectatissimis amicis suis Austriacis sal.
Et Tiberi gratulor de aenigmate diligenter soluto et Zythophilo de nobili epigrammate. Ita est, ut scribitis: Duo sunt monumenta sepulcralia, quibus Antonius Canova honoratus est. Alterum Venetiis exstructum est in aede sacra S. Mariae Gloriosae quae vocatur dei Frari (simile est illius, quod Vindobonae reperies in ecclesia Augustinorum), alterum Possanii in Templo Canoviano.
Optime valete.

[Tiberis]

Tiberis amicis suis sal.



murmure ego triplici lucem gratumque saluto

solem percursis montibus et tenebris.

est breve iter reliquum. veteres me nosse poetas

scito atque Iliacam progeniem celebrem.

de quo agitur?

[consus]

Arcanis iterum mentes, Sphinx saeva, loquelis

Vexas: Heu! vereor, ne tua verba necent.

[Tiberis]

non hominem quaero. hoc satis auxilii tibi esto!

[consus]

Oedipus Rhenanus Sphingi Styricae sal.
Manibus quidem tremebundis, sed magno animo fortique hoc ausim scribere:
Aenigma puto pertinere ad speciosissimas illas aquas prope oppidum Interamnam per tres gradus ingentes maximo cum murmure labentes*. Quibus nomen Italicum inditum est Cascate delle Marmore (http://www.youtube.com/watch?v=piFMBeg746o).
Optime vale.

______________________________
* Cf. Cic. Att. 4, 15, 5. Verg. Aen. 7, 517.