aenigmata

[consus]

o solutionem quasi in propinquo iacentem...

Nonne nosti, spectatissime mi amice, certis de causis et quibusdam aliis libentissime me quoque versari intra fines imperii Austro-Hungarici?

[Tiberis]

etiamnunc mihi molestum est, quod solutionem non inveni, utpote qui amantissimus sim illius "sanguinis taurini Agriensis" sive Égri Bikavér; numquam enim , cum in Hungaria versabar, redibam, quin nonnullas huius excellentissimi vini lagoenas mecum portarem...

[Medicus domesticus]

Ecce novum aenigma, quo vos delectetis, amici, quamquam pluit sine intervallo

Una eminet columna ex terra haud procul mari.
Scriptor Graecus aedificium deae dedicatum noverat
et inscriptionem a viro praeclaro ibi positam.
Qua ille utebatur in opere scribendo.


Nomen aedificii, scriptoris Graeci et viri praeclari?

Optime valete!

[consus]

Consus Medico suo Domestico s. p. d.
Quamquam stilum non sine cunctatione in manum sumo, tamen re diligenter semel atque iterum retractata haec ausim scribere:
Nomen
(1) aedificii] Liv. 24, 3, 3: Sex milia aberat ab urbe [sc. Crotone] nobile templum, ipsa urbe nobilius, Laciniae Iunonis, sanctum omnibus circa populis.
(2) viri praeclari] Hannibal, qui columnam in illo templo positam rebus bello Punico secundo a se gestis inscripserat.
(3) scriptoris Graeci] Qua inscriptione postea usus est Polybius, clarissimus ille Historiarum scriptor.
Vale. IV Non. Iun.

[Medicus domesticus]

Euge , optime solutum , mi Conse doctissime! Hodie inscriptio Hannibalis non iam videri potest, sed unam columnam templi sacri e terra eminentem spectabis:


Haec legi et vidi imaginem in libro novo de Carthagine [*] scripto.

[*]
Klaus Zimmermann, Karthago - Aufstieg und Fall einer Großmacht (WBG 2010). De inscriptione Hannibalis: Πολύβιος, Ἱστορίαι III, 33

Optime vale!

[consus]

Flandria vitalem florens tibi tradidit auram,

Urbsque tibi placuit flumine nota suo.

Corripuit miserum pallens te mors peregrina,

Carmine sed melico clarus in orbe manes.

[Zythophilus]

A Belgis genitum primo Lutetia amauit.

Omnibus in terris post celebratus homo est.

Carmina mouerunt distorto prodita uultu.

Condita adhuc animos uoxque melosque mouent.

Huic ne quinque quidem tribuere decennia Parcae

ossaque nunc distans litus humata tegit.

Te, optime Conse, de Iacobo Brelio (Jacques Brel) locutum esse censeo.

[consus]

Consus Zythophilo suo ceterisque amicis illustrissimis sal.
Versibus tuis politissimis perlectis, optime Zythophile, tuoque errore animadverso tantus me dolor opprimit, ut versus ipse facere non possim. Ita est, mi amice: error te tenet; nego enim Lutetiam Parisiorum urbem esse “flumine notam suo”. Ne longum faciam: rem non solum ad Flandriam, sed etiam ad Austriam vel potius ad urbem Austriacam et Italiam scitote pertinere! Praeterea, ut nomen musici investigare possitis, regredi vos oportet in saecula longe praeterita.
Sit bene vobis! Non. Iun.

[Tiberis]

Tiberis Conso suo s.d.p.

verbis aenigmatis abs te, mi amice, benigne mutatis haec dicere ausim: puto musicum illum esse Henricum Isaac, qui medio fere saeculo XV. in Flandria natus anno MDXVII Florentiae mortem obiit.
inter permulta eius opera carmen quoque ad Oenipontum pertinens invenitur, quod inscriptum est: Oenipontum, tu mihi es relinquendum.

[consus]

Consus Tiberi suo s. p. d.
Gratulor tibi, mi amice, de aenigmate iterum abs te optime soluto. Carmen illud mihi maxime scito placere! Cuius modos audienti vehementer mihi commoventur „pectoris ignes“. Quod vero ad ipsum aenigma pertinet, iam timeo, ne versus a me facti obscuriores fuerint…
Vale. VIII Id. Iun.

[Tiberis]

Tiberis amicis suis s.d.p.

Est via declivis: credas, quodcumque movetur,

seu pila sive rota est, inferiora sequi.

Nec tamen hic ea lex spectata valere videtur:

sursum cuncta meant, prona licet via sit.

ubi ?

[romane]

nonne descripsisti, Tiberis, casam magneticam?

[Tiberis]

nonne descripsisti, Tiberis, casam magneticam?

licet in "casa magnetica" abs te citata similia conspiciantur , optime romane, sed aenigma est de via quadam , quae, ut fieri solet, sub divo facta est. quae ceterum non in Germania invenitur.

[consus]

Ave Sphinx Styrica! Oedipus Rhenanus dubitatione distractus te salutat.
Quod ad illam viam declivem pertinet, nihil aliud mihi in mentem venit nisi hoc: Quicumque naturae rerum est peritus, ei notum est conum geminatum per viam declivem sursum ferri.

[Medicus domesticus]

Salve optime Tiberis,
Censeo locum quaesitum aenigmatis abs te propositi "Polum magneticum" (Polo Magnético) esse. Qui situs est in insula, quae nostra lingua "Dominikanische Republik" appellatur......Autocinetum, qoud est vehiculum rotale, hoc loco sursum (sive rursus) ferri videtur.

Vale.