Nugae

[Zythophilus]

Venturum Dominum primus mox nuntiat ignis.

Ostendet Dominum quartus adesse flagrans.

[Zythophilus]

Quae niue operta iacent, coguntur rura silere;

consistent nimio flumina cana gelu.

Iam petiit uolucrum regiones turba calentes

nec gelida in orno garrula cantat auis.

[Zythophilus]

Nocte nigra coepit mensis lux quarta Decembris

et solita acris hiems frigora dura feret.

[Zythophilus]

Annus uti uoluit, Nonae coepere Decembres:

Hac pueri metuent daemona nocte malum.

[Zythophilus]

Mensis sexta tibi, bone Sancte, sacrata, Decembris,

lux est, qua pueris gaudia ferre soles.

[Zythophilus]

In terram mensis lux septima missa Decembris

et sol conspicitur cuncta tepore fouens.

[Zythophilus]

Quae sine peccato mater concepta futura es,

hac, Maria alma, tibi laus sit honorque die.

Haec octaua dies mensis fert festa Decembris,

sicut nos uoluit credere papa Pius.

[Zythophilus]

Mensis nona dies iniit demissa Decembris

uigintique dies hic habet annus iens.

[Zythophilus]

Vrbs petitur nobis, ubi aquas tria flumina miscent

et, dum iuncta coit, perfluit unda triplex.

Magna licet placidam lauet urbem copia aquarum,

nos unda minime tinguimus ora leui,

nam scimus fieri laticem a coctoribus acrem,

potus in ora fluens ut Cerealis eat.

[Zythophilus]

Non reditura dies mensis decima orta Decembris,

dum pede ueloci mensis et annus eunt.

[Zythophilus]

En, lacus in mediis mirissimus Alpibus extat,

in qua stat gelida silua uetus sub aqua.

https://youtu.be/B56j7edhJ0o

[Zythophilus]

Canens undecimus dies Decembris
coepit mensis et it carens calore.

[Zythophilus]

Extremi lux est anni decima altera mensis

et, quasi uer mulcens coeperit, aura tepet.

[Zythophilus]

Hoc Idus anno cedunt abeunte Decembres

nec gelida cruciat nos niue mitis hiems.

[Zythophilus]

Denique post Idus iniit lux prima Decembres

nec nix Vindobonae prata uiasque tegit.