aenigmata

[Medicus domesticus]

Ecce novum, amici!

In orbe terrarum invenis locum amoenum,
qui in parte meridiana insulae mirandae situs est.
Perpauci homines ibi incolunt et sinum maritimum montemque vides.
Figura montis in sinu siti tibi affert memoriam tegumenti capitis sacri.

Quae insula?
Nomen montis et sinus maritimi?

Optime valete, aenigmatores!

[Tiberis]

Tiberis Medico suo s.d.p.

sunt duae insulae in Oceano Pacifico sitae, quae lingua aboriginum Aotearoa , nostra autem "Neuseeland" appellantur. in insula meridionali mons ille invenitur, cuius forma mitrae episcopali simillima est; qua de causa "Mitre Peak" vocatur. nomen sinus maritimi: Milford Sound.

bene vale!

[Medicus domesticus]

Optime solvisti aenigma, mi Tiberis...gratulor tibi
Ante tredecim annos illum locum amoenissimum spectavi (cum uxore mea) [*]

[*]
http://davidwallphoto.com/images/%7BCC8 ... 35B%7D.jpg

Vale!

[Tiberis]

Tiberis multa nocte amicis suis aenigmatophilis sal.

agitur de opere celeberrimi cuiusdam pictoris..

Infelix patriae mediis stat virgo ruinis:

non tegit indigenus pectora nuda habitus.

obruta saxis - heu - populi nunc spes iacet omnis :

tuque, colore nigro barbare, sceptra tenes.

nomen picturae ?
nomen pictoris ?
quo in museo ?

[romane]

a - libertas ducit populum
b - Eugène Delacroix
c - Musée du Louvre

[Tiberis]

erras, mi Romane, quamquam...

[consus]

Consus Tiberi suo sal.
Nonne tabula est ab Eugenio de Cruce picta? Inscribitur Graecia in Mesolongii ruinis exspirans. Exhibetur Burdigalae in Museo Bonarum Artium. Sed iterum timeo ne eqs.
Optime vale.

[Tiberis]

Sed iterum timeo ne eqs.

hoc loco communi sive τὀπωι modestiae Consus noster non carebit , etsi non dubitat, quin rectam invenerit solutionem..
at ego timeo, ne nihil iam inveniam, quod abs te non possit investigari...
quid plura? GRATULOR !

[consus]

Paene dixi, optime Tiberis: Nonne illa tabula* considerata etiam de praesente Graeciae difficultate pecuniaria admonemur?
________________________________________
* http://art.mygalerie.com/lesmaitres/delacroix/grece_large.jpg

[Tiberis]

hac difficultate pecuniaria - ut aperte dicam - adductus ipsam eam tabulam pictam elegi..

[consus]

Amicis illustrissimis:

Eminet e pelago scopulus: par esse videtur

procero calamo, par quoque nomen ei.

Aethera tangit apex; radix latet aequore tecta;

Tethys Tyrrhenis fluctibus ambit eum.

Summa silex statua* decorata est haud ita magna,

Christicolae quondam quam posuere pii*.

Nomen scopuli? Ubi eum invenies?


__________________________
* Scribo itinerarii verba secutus.

[Apollonios]

Scoglio Quaglietto, prope insulam cui nomen indicat ibi Vulcani fabricam fuisse. ni fallor, statua Virginis Mariae est in caverna sub aqua.

[consus]

Erras, optime Apolloni . Nonne imprimis duos neglexisti versus? (2 et 5). Neque tamen causa est cur abicias hastam...

[Medicus domesticus]

Puto locum quaesitum esse "La Canna" .... Insula in Mare Tyrrheno sita "Filicudi" appellatur?

.....

[consus]

Eu euge eugepae, mi Medice! Rupes est, cui nomen Canna, haud procul ab insula Phoenicusa (Φοινικώδης > Filicudi) e mari surgens. Statuam Mariae, qua summam rupem ornatam esse scripsi, nescio qua de causa triginta fere ante annis in fluctus praecipitatam et ab urinatoribus miro sane modo investigatam suo iterum loco positam esse in quodam itinerario legi.