aenigmata

[Tiberis]

Sphinx Styriaca Oedipodi in tenebris erranti s.d.p.

erras, mi Conse! cogita, quaeso, haec verba : montibus et tenebris , deinde: est breve iter reliquum.
sed nescioqua causa iterum volo mitis esse : "res" quaesita , ut plerumque fieri solet, intra fines
imperii Austro-Hungarici invenitur...

[consus]

Est gravis ima dolor mihi nunc delapsus ad ossa

Et morsu rabido viscera rumpit atrox.

( )

[Tiberis]

heu ! tantis te ,Conse, doloribus excruciari

- mitis Sphinx ego sum - non fero, non patior.

auxilium fertur: "tenebras permensus inanes

arcanasque vias exodium video.

mille fere passus restant, dum solvor in undis

- heu, modo luce fruens! - caerulei pelagi."

[consus]

Nunc, Sphinx mitissima, haec verba oculis tuis ausim subicere: Rete diligenter perscrutatus fluvium inveni Timavum, cuius mentionem faciunt et Vergilius (Aen. 1, 244) et Martialis (4, 25, 5). O di immortales, quantae erat molis illud solvere aenigma!

[consus]

Exspectationis plenus:

Me miserum recreat, Tiberis, nunc unda Timavi:

Invento fluvio spes mihi firma favet.

[Tiberis]

horribiles iterum tu evasti, callide, fauces

Sphingis, quae mitem se modo praestiterit.

laudes ecce sonant et tergemina ora Timavi,

leni cum strepitu: "gratulor ex animo!"

[consus]

Laetitiae mihi signa licet dare, Sphinx generosa:

Pervigiles curae nam periere meae.

[consus]

Est locus in terris, quem bubulus irrigat humor

Fervidus. Est astris clarus et arce locus.

Breve quidem aenigma, amici spectatissimi, sed plenum quaestionum!

[Tiberis]

vocibus obscuris Rhenana iterum loquitur Sphinx.

quid quaeram? fluvium? me miserum Oedipodem!

[consus]

Illis uti mihi liceat verbis, mi optime amice, quae nudius quintus ipse scripsisti:

"res" quaesita, ut plerumque fieri solet, intra fines imperii Austro-Hungarici invenitur...

Est locis in terris, tauri qui sanguine claret

purpureo, stellis clarus et arce potens.

[Medicus domesticus]

Medicus conso suo aenigmatophilo s.d.p.

Censeo Agriam (nostra lingua illud oppidum "Eger, sive Erlau" appellatur) in Hungaria sitam solutionem aenigmatis tui esse. Ibi vinum praeclarum bibi potest nomine "sanguis tauri Agriae" (nostra lingua "Erlauer Stierblut"). Non solum invenies fontes fervidos in oppido praedicto, sed etiam arcem praeclaram.

Optime vale!

[consus]

Bene quidem, mi Medice; sed oro te dicas, quanam de causa "astris (stellis) clarus"? Scripsi enim "plenum quaestionum".

[Medicus domesticus]

addendum:
Géza Gárdonyi, scriptor Hungaricus praeclarus, scripsit "Die Sterne von Erlau" ....

[consus]

Consus amicis suis pariter omnibus, imprimis Tiberi Medicoque sal. pl. d.
Perfecte nunc solutum, optime Medice, szívből gratulálok! Ex animo gratulor. Illum librum Hungari ad unum omnes, quod sciam, solent legere. Quod vero ad ipsum aenigma attinet, iam timeo, ne verbis “tauri sanguine” additis eius vim atque naturam infregerim.
Curate ut valeatis.

[Tiberis]

o solutionem quasi in propinquo iacentem, cum ego caecissimus iam de flumine Jangtse cogitaverim, cuius superior pars a Tibetanis bubulus fluvius appellatur..