aenigmata

[consus]

Nonne est, mi Zythophile, collis, qui Theodisce Erzberg appellatur? Situs est in Alpibus Ferrariis, quas in Stiria sitas esse novimus (Theodisce: Eisenerzer Alpen).

[consus]

Addendum.
Daemon ille, qui et Aquarius appellabatur, nisi vehementer fallor, hoc fertur dixisse: „Aurum annorum promitto decem, argentum autem centum, at ferrum in omne tempus“.

[Zythophilus]

Cedit, Conse, tibi Pylius, superatur Vlixes,

ut nihil in toto te fugere orbe putem.

[consus]

Obiter dictum:
Nonne nosti, optime Zythophile, res Austriacas privatis de causis mihi esse cordi?

[Zythophilus]

Addendum:
Aes licet insit adhuc saxis, iam promere nolunt

quodque liquefaciant, ferrum alicunde ferunt.

[consus]

Ecce aenigma historicum, amici spectatissimi!

Est locus in terris, ubi collem conspicis altum,

Ornat quem validus magnanimusque leo.

Mortales statuam grati posuere leonis:

Ungula dextra globo nititur atque cubat.

Victores homines tumulum fecere superbum,

Excideret ne animis pugna cruenta suis.

Quod monumentum?
Quae pugna?
Quando commissa est?

[Zythophilus]

Hic, ubi uictus erat Corsorum filius armis,

stant in colle nouo maxima signa ferae.

Francorum spoliis fecerunt membra leonis,

Belgica qui cunctos despicit arua monens.

Te, Conse, existimo illum leonem aenum quaesiuisse, qui pugna ibi anno MDCCCXV facta ad municipium, cui nomen est Waterloo (foramen aquae?) positus est.

[consus]

„Aut noctem aut Blucherum!“ dixit dux Anglius audax,

Praesidium sperans hoc fore forte sibi.

Mox duce magnanimi Bluchero venere Borussi

Francorumque truces perdomuere manus.

Quo viso vocem fudit Cambronnius acrem:

“Merda! Nihil dicam nunc nisi: Merda madens!”

Optime solutum, Zythophile! Gratulor. Quid plura?

[Zythophilus]

Alterum leonem quaerimus:
Dic mihi, ubi liceat dormire uidere leonem,

quique locus teneat saxea membra ferae.

Hoc illata loco clades est prima tyranno:

Danubio uictum crede fluente ducem!

Qui duces?
Quae pugna?
Quando?

[consus]

Nonne, mi Zythophile, ante oculos tibi obversatur dormiens ille leo, quem conspici licet in vico Aspern haud procul a Vindobona sito? Pugna ibi commissa est XII et XI Kal. Iun. MDCCCIX. Francogallorum dux: Napoleo, Austriacorum sociorumque dux: Carolus archidux. Vide http://austria-lexikon.at/attach/Wissenssammlungen/Denkmale/L%C3%B6we_von_Aspern/Loewe_von_Aspern_kl.jpg

[Zythophilus]

Nunc est Vindobonae statua illa leonis, ad urbem

quae fuit, atque aucta ciuis in urbe leo.

Vera quidem de dicto uerba fuere leone

resque bene exposita est. Gratulor – euge! – tibi!

[consus]

... ad municipium, cui nomen est Waterloo (foramen aquae?) ...

Salve, Zythophile! Quod sciam, illa syllaba -loo non foramen (id est Loch) significatur, sed lucus, cui vocabulo Latino propinquum est Theodiscum antiquum lōh, id est nemus (exstat et in Batavorum lingua: -loo et in lingua Anglorum antiqua: leah). Cf. Lucus Augusti = Luc-en-Diois; Gütersloh = Guntari (?) lucus; (Duisburg-)Marxloh = Marci (?) Lucus; Waterloo ~ Lucus Aquosus; Eastleigh.

[Zythophilus]

Ecce. Hac re a te optime ostenta, mi Conse, prudentior factus sum. Gratias.

[consus]

Amicis suis sal. Ecce aenigma geographicum sive historicum:
Duo sunt oppida antiqua, quorum nomina Latina ex septem litteris composita inter se quarta sola differunt littera. Alterum in Asia situm est, in Europa alterum.
Quae oppida?

[consus]

Iam mea verba puto nimiis contecta tenebris:

Haec ego nunc mitto commodiora nova:

Alterum in Asia situm est, in Pannonia alterum.