LATINITAS VIVA

[Zythophilus]

Fetischist: qui aliquam rem modo peruerso amat.

[Laptop]

Vinum nouum dicerem.

Quid, quaeso, vis verbo "novum" dicere, "immaturum" aut "neotericum" (germanice modern, neumodisch)?

[Zythophilus]

Nescio, sitne quidam auctor Romanus, qui hac de re scripserit, sed Itali tale uinum, quod "immaturum" uidetur, "uinum nouum" appellare solent. Nominis, quo Germani utuntur, forma uerbo Latino reddita uti non licet; quod uerbum neque apud Heluetios modernos neque apud Austriacos intelligitur. Ipse quadam curiositate adductus lexicon consului, ut noscerem, quid sit "Federweißer", cum uerbum ignotum esset.

[Zythophilus]

Etiam Noui Testamenti mihi in mentem uenit, ubi de uini noui mentio fit (Mt 9,17 par.). Tale uinum, quale hoc loco memoratur, uinum immaturum esse uidetur, ut fermentatione nondum finita utres rumpi possint. Quin lingua Noui Testamenti Latina non sit, dubium non est, sed hunc locum ab usu linguae Latinae abhorrere non puto.

[consus]

Deutsches Wörterbuch (Grimm) s. v. federweisz: "am Rhein federweisz vom schäumenden moste". Nonne ergo mustum fervens sive fervidum? Fronto, Aur.Caes.4.4.3.1: "Quom videbis in dolio mustum fervere, in mentem tibi veniat mihi sic in pectore tuum desiderium scatere et abundare et spumas facere."

[Zythophilus]

Quid interest inter mustum feruidum et uinum nouum? Idem esse reor.

[consus]

Quid interest inter mustum feruidum et uinum nouum? Idem esse reor.

Forsitan ita sit ut scribis. Sed videant vinitores, vini potores, cuparii, totaque vini amantium caterva...

[Zythophilus]

Alios alio uerbo uti existimo. Mustum feruens uel feruidum qui dicit, statum potus se mutantis describit. Qui autem de uino nouo loquitur, iam inesse plus Bacchi quam humoris innocui contendit, ut potus nomine tali dignus sit.

[Tiberis]

Quid interest inter mustum feruidum et uinum nouum? Idem esse reor.

equidem eas potiones aliquantulum inter se differre censeo. nonne vinum novum id est, quod Vindobonenses "vinum hornotinum" ("heuriger"), populares autem mei "vinum novum nobile" ("junker") appellant? a quo mustum eo differt, quod nondum desiit effervescere. ex quo fit, ut talem potionem in Styria "turbidam" ("sturm") appellemus; quam ab illo "federweisser" non multum differre puto.

[Zythophilus]

Cognita, quae memoras, scito mihi turbida uina:

Heu, stomachum miserum talia musta mouent!

De uino uel mustoque Plinius loquitur: medium inter dulcia unumque est quod Graeci aigleucos vocant, hoc est semper mustum. id euenit cura, quoniam feruere prohibetur — sic appellant musti in vina transitum. (Nat. hist. XIV 83)

[Zythophilus]

Quod antea iam efferbuit meo in uaso,
mustum furens efferuet in meo uentre.
Mox tertio loco audietur hic feruor!

His uersibus lectis unusquisque, quid sit "Federweißer", intelleget.

[consus]

...His uersibus lectis unusquisque, quid sit "Federweißer", intelleget.

Facetissime dictum, spectatissime amice! Sed admodum mirum mihi videtur, quod is qui illam posuerat quaestiunculam adhuc huic non interfuerit disputationi.

[Zythophilus]

Cur Vulpius labris tacentibus distat?
An impedit mustum uirum, quod hic quaerit?
Dic, quaesumus, quod ipse cogitas, Vulpi!

[ThomasVulpius]

Facetissime dictum, spectatissime amice! Sed admodum mirum mihi videtur, quod is qui illam posuerat quaestiunculam adhuc huic non interfuerit disputationi.

Ea, quae proposueratis, legi et de aptissima translatione cogitavi.
Quam aptissimam esse duxero, eam in lexicon a me ipso compositum inseram.

Praetereâ de hac re interrogavi Robertum Maier, eum, qui Apicium in domo editoriâ Reclam ediderat.
Sed quia responsum nondum acceperam, de eo, quid coryphaeus ille artis coquinariae proposuisset, vos certiores facere nondum potui.

[ThomasVulpius]

Cur Vulpius labris tacentibus distat?
An impedit mustum uirum, quod hic quaerit?
Dic, quaesumus, quod ipse cogitas, Vulpi!

Hoc quidem scio illud vini genus τὸ γλεῦϰος Graece nominari.