Nugae

[Zythophilus]

Pontica nocturno sunt litora licta uolatu

nec mea arena calens terga pedesque fouet

nec, quam Pontus habet, maledicit gauia rauca

sed merula in patria nigra loquaxque canit.

[Zythophilus]

Maximus inuentus monstratur penis Odessi,

qui tectis aliis aptior ante fuit.

[Zythophilus]

Te dimisit iter post longius ultima Thule

an glacies tua adhuc membra gelata tenet?

[Zythophilus]

Quondam quam laesus periit formosus Achilles,

calx uexata dolet me mea paene necans.

https://ortopedicosfuturoco.vtexassets. ... 2919830000

[Zythophilus]

Quae mare transierat, posita est in litore nauis,

et parat ille cibos, qui fuit ante latro.

https://encrypted-tbn0.gstatic.com/imag ... n3Xop5uQ&s

[Zythophilus]

Non uenit a gelidis ad nos iam nuntius oris

et procul a patria, callide amice, taces.

Te reor albentis laniatum dentibus ursi

aut tua – uae – niuibus frigida membra tegi.

[Matthaeus]

Qui modo caeruleas gaudebas nare per undas,

tu mihi nunc, salmo, tostus in igne places.

Trutta, minor salmone tuo sis ipsa propinquo,

sed tamen adverso flumine nare soles.

iamque abiit tempus celeris ascendere lymphas,

viribus et furni parcere in igne licet.

https://uni-muenster.sciebo.de/s/fmx6QUHr8117kE9

[Zythophilus]

Heus, dic te ualidum uirum, uirago,
aut, uir fortior, esse te puellam
dic, sed uim retinens tamen uirilem
noli caedere feminas tenellas!

[Zythophilus]

Iam patrias oras nos noscite nuper adisse

et liquisse cita te, fere Ponte, uia.

Sunt thermae ueteres, cauponae, templa relicta,

nec mihi defessum tergus arena fouet.

[Zythophilus]

Calce potens heros periit Thetideius icta:

Me quoque calx casu laesa ferente dolet.

Me grauis eneruat miserum ruptura tenonis

moxque mihi tollet dura secena malum.

[Zythophilus]

Impositus lecto mediis iaceo aeger in aegris

optoque, ut redeat mox mihi tota salus.

Cum medicus ferro calcem secuisset acuto,

somnia sopitum me rapuere mihi.

[Matthaeus]

Impositus lecto mediis iaceo aeger in aegris

optoque, ut redeat mox mihi tota salus.

Cum medicus ferro calcem secuisset acuto,

somnia sopitum me rapuere mihi.

Ictus erat certa Pelides ille sagitta

et quae nunc bello mortuus arua colat,

nescio ego. Sed non dubium est: inuiderit heros

Zythophili curae carminibusque fori.

Tu velim, o Zythophile, cito conualescas!

[Tiberis]

Nullus Priamides mortifera manu
icta calce animam finierat tuam.
Aegrotus iaceas, sed tibi consulunt
sollertes medici , qui efficient, brevi
ut possis spatio vadere ut antea.

[Zythophilus]

Cara uocante parens Domino conscendit ad alta,

matris ut ornaret digna corona caput.

[Zythophilus]

Omnia Cecropiam deuastat flamma prope urbem

nec tecta aggrediens sistitur ignis aqua.

https://cdnph.upi.com/svc/sv/upi_com/24 ... Athens.jpg