Nugae

[Zythophilus]

Nat prope Tergesten placidum balaena per aequor,

sed modo agunt fluctus mortua membra ferae.

https://www.krone.at/3510510

[Zythophilus]

Vespa uolat celeres centum comitata sorores:

Dulcem uult laticem grex sapidasque dapes.

https://cf.ltkcdn.net/garden/images/std ... of-jam.jpg

[Zythophilus]

Versus quominus ederem facetos ...

Vndenas Tiberis Catulliano
uates ordine syllabas iugauit,
ut uersus faceret iubente Musa,
cum corpus premeret calor miselli
et mens uix toleraret aestuantem
solem, quam gelidum refrigerare
uix possit Styriae merum fauentis.
Carmen dulce dedit foro elegansque,
cum nollet manus aridae papyro
uoces tradere opus stilo negante.

[Tiberis]

Multa nocte ego scripseram poema,
corpus quo tolerare posset aestum.
scribenti rota ventilans poetae
sudorem minuit molestiorem.
at miror, calidis quod his diebus
versus continuas perelegantes,
tamquam e fonte fluant aquae perenni.

[Zythophilus]

Aestu ne pereat, precor, poeta,
sed mox uim minuente sole duro
uersus det lepidos foro magister
et tractus Styriae quiete et imbre,
qui campos riget et nemus, fruantur.

[Zythophilus]

Hac exire uagus si posset pyxide piscis,

ad Prasios faceret per mare promptus iter.

https://i.ebayimg.com/images/g/rZMAAOSw ... l1600.webp

[Zythophilus]

Ante diem solitum Natalis festa tyrannus

parentem populum iam celebrare iubet.

https://edition.cnn.com/2024/09/03/amer ... index.html

[Zythophilus]

Constantine, tuum fulmen decidit in arcum:

Miseruntne poli numina laesa malum?

https://www.internazionale.it/ultime-no ... da-fulmine

[Zythophilus]

Iane, canis cunnos, capiti cum sit mitra compto,

inque tuis posita est mentula saepe metris.

Et uersus referunt te pedicasse libenter

lasciuaque, salax mente fuisse uirum.

Aut tua res fictas, o Iane, Camena renarrat

aut dubiae uitae non fuit aptus honor.

[Zythophilus]

Ex arto mulier defugit capta suili:

Quare non aluit degener ille sues?

https://orf.at/stories/3368187/

[Zythophilus]

Quaedam discipulis ostendere carmina possum,

candide, si cunnos, Iane poeta, taces.

[Zythophilus]

Vin depellere daemonas molestos?
Monstrat posse fugare monstra Ianus
te, Martine salax, metris iocosis.
Te mandata sequi iubemus illa,
ne te daemones appetant maligni.

[Zythophilus]

Scimus ab Ausoniis sine uino liba uorari,

cum Cereris potus sicca palata iuuet.

https://www.spice-electronics.com/en/bl ... R4UtB3YOJR

[Zythophilus]

Te mactare uetat uespas lex dura molestas:

Multa magis spina te cruciare potest.

https://www.thelocal.de/20240715/can-yo ... in-germany

[Zythophilus]

En, quid edit feles, a qua tua tecta coluntur?

Huic sit daps melior, quam cupis esse tibi!