Nugae

[Zythophilus]

Nos modo Crumauiam iusserunt otia adire,

quod lepidum oppidulum ripa recurua tenet.

Inter tecta situs curui sonat ambitus amnis

et celsa strepitans unda sub arce fluit.

Arcis porta minax firmae defenditur ursis,

fossa quibus timidis facta profunda domus.

Non procul hac coquitur ceruisia sede ferarum,

arxque suos potus Crumauiensis habet.

[Zythophilus]

Buduicium est aditum, quod nobile fecerat humor,

ut fugerent potus pocula plena sitis.

Et latices puteus Samsonis saxeus edit

et media posita est turris in urbe nigrans.

Pro puteo petimus, quos dat caupona, liquores,

ne sine ui Bacchi perfluat unda gulam.

[Zythophilus]

Boiorum regio mihi denique pulchra relicta est

et rursus reducem me patria arua tenent.

Apportata mihi spumantis copia potus,

ne mea uexaret membra molesta sitis.

https://media.marktjagd.com/13119353_250x248.jpg

[Zythophilus]

Quis dedit huic uitreae uates epigramma lagoenae?

Vasa quidem metris plena carere reor.

Epigramma vin.png (167.76 KiB) 3632-mal betrachtet

[Zythophilus]

Sole cutem feruente uolunt ceruisia fuscet,

sed pro pelle gulae est haec tribuenda tuae.

https://www.rtl.de/cms/bier-auf-die-hau ... 49066.html

[Zythophilus]

Per Pompeiopolis plateas properare feroces

consuerunt populo conueniente boues.

https://www.pamplonafiesta.com/

[Zythophilus]

Mox ad Thessaliam uisurus multa uolabo,

ut uagus aspiciam templa, theatra, domus.

https://dynamic-media-cdn.tripadvisor.c ... 0&h=-1&s=1

[marcus03]

Aspicienda aspicias,avolature aspectum, nobisque referre ne desieris, quae aspexeris,
nil aspecti retinens nec nobis non relevans semper comperiendi cupidis,
quo liquore perfructus demum denuo sentias, ad quid sis natus.
Videas, ne nullo, quo sis moraturus, loco exsicceris ad tempus
providens, ne aquam bibere cogaris humore tibi maxime desiderato carens.
Zythophilus non iam eris, si cervisiis abstinens omnibus
vitae veris voluptatibus non iam delectari coeperis.
Feriae tibi afferant otium adeo desideratum satisque temporis
nos tuis oblectandi carminibus perpulchris et salsis.
Te lecto ius sale afficere legentem non iam opust.
Ne sis oblitus et terris alienis esse feminas specie venusta, quae dignae sint aspectu,
ut cor virile summo afficiatur gaudio et admiratione.
Exopto iter quam iucundissimum aspectusque te inspirantes ad
artem poeticam quam saepissime adhibendam tuam,
qua multorum animos te legentium gaudio affectum iri magno mihi persuaserim.

[Tiberis]

Sermone alloqueris Martinum, Marce, barocco,

ne dicam tumido (sit modus eloquio!).

Zythophilo placeat neque ego praescribere vellem

opportuna magis quae tibi verba forent.

Sed sermone tamen si utaris simpliciore,

ad rem conveniant , ut puto, dicta magis.

[Zythophilus]

Deque uia longa referam nec uisa tacebo,

nam mihi sunt quaedam disticha iuncta metro.

Plenos signorum Scupos memorare licebit,

quemque lacum potat Lychnidus, ipse canam.

Regia uersiculis dicetur Pella iocosis

et, Penee, tuas carmen habebit aquas.

[Tiberis]

Humanum calefactione caeli
tabescit cerebrum, ut renuntiatur.
Istud quid sibi vult? An Africanis
qui sub sole colunt calente terras,
fervens deminuit calor cerebrum ?
Ipsis in calidissimis per orbem
terris nonne fuere civitates,
quae cultu ingenioque praevalebant ?
Nil est, quin calefactionem ad illam
nonnulli referant, ineptiora
certis cum anteferunt modo protervo.


http://www.berliner-zeitung.de/news/kli ... -li.366597

[Zythophilus]

Vrbi Thessalicae nos ferrea tradidit ala,

longius ut per rus hinc faceremus iter.

Magna uagaturos excepit raeda per oras

atque in Paeoniam nos rapida inde tulit.

Antiquas Erigon ubi flumen conspicit aedes,

nos meminisse uagos tempora lapsa iuuat.

Dat calices nobis Bacho caupona repletos,

sed tamen his uini constat inesse parum.

Tunc uehimur Scupos, ubi murmurat Axius amnis

et fluuio curuo moenia lata lauat.

[Zythophilus]

Non modo conspicimus Romae uestigia clara,

et quas post lepidas saecla dedere, domus.

Aetas nostra dedit Scupis monumenta uidenda,

ut sibi magnificae gloria honorque foret.

Regis Alexandri tollit simulacra columna,

in qua Bucephalas saltat aenus equus,

nam debere duci noua se res publica fontem

et ueteris populi se genus esse putat.

[Zythophilus]

Christe, tuum signum summo stat monte, redemptor,

urbs ut conspiciat nocte dieque crucem.

[Zythophilus]

Ad miram portat nos denique raeda paludem,

cui prius, ut scimus, moenia Roma tulit.

Tangitur admotis – est arx sita – Lychnidus undis

et pisces uarii stagna profunda colunt.

Cernimus in media laeti uetus urbe theatrum

et quae per plateas saxa uetusta iacent

.Hic sanctus colitur praeceptor nomine Clemens,

Slauos qui docuit scribere uerba notis.