quaeruntur de somnambulismo loci

[ille ego qui]

salvete sodales,

suntne vobis aliqui loci noti, quibus sive Graece sive Latine de somnambulismo agatur - sive antiqui sive recentiores? compertum equidem habeo verba somnambulonis (-o, -onis, m), noctambuli (-us, -i), somnambulandi (-are) antiqua non esse, sed postea nescio quando conficta - at fieri posse censeo, ut veteres alio nomine vel fortasse nullo certo nomine, sed pluribus verbis de hac re scripserint ...
nimirum reperiuntur disputationes a viris doctis recentioribus aetatibus exaratae ...

https://www.google.de/search?q=schlafwa ... 2&start=10

molliter cubetis neque dormientes huc illuc ambuletis!

[Medicus domesticus]

Salve ille,
Hac in disputatione medica de noctambulis sive somnambulis invenies nonnullos locos. Aristoteles et Galenus noster etiam scripserunt de somnambulone:
http://tinyurl.com/odp27ve
Aristoteles scripsit opus, quod appellatur "De somno et vigilia" (Περὶ ὕπνου καὶ ἐγρηγόρσεως).
Optime vale.

[ille ego qui]

gratias maximas tibi ago, Medice!
quomodo tu istos locos vel libros indagasti (in quos quam primum incumbam)? an indagare te ut doctissimum necesse non erat?
scin quo verbo Graeculi illi usi sint ad istam rem significandam?

[Zythophilus]

In lexico Georgesiano "Nachtwandler" lunaticus uocatur. http://www.zeno.org/Georges-1910/A/Nach ... =lunaticus

[ille ego qui]

maximas gratias tibi ago, Martine
eiusdem autem Georgesii lexico Latino-Theodisco inspecto ista, quam indagasti, vox potius ad eos videtur spectare homines miserrimos, qui vitio illo seu morbo comitiali laborant - eam quam nunc Graeco nomine epilepsian appellamus ...
ecce: http://www.zeno.org/Georges-1913/A/luna ... =lunaticus
quam primum igitur locos a Georgesio allatos diligentius excutiam

[consus]

Salvete, amici
Nostra quidem aetate Graeci hoc utuntur vocabulo: ὑπνοβάτης, sed doleo quod non continetur LSJ. Nescio an operae pretium sit legere quid Aristoteles scripserit in libro qui inscribitur Περί ύπνου καὶ ἐγρηγόρσεως.

[Medicus domesticus]

scin quo verbo Graeculi illi usi sint ad istam rem significandam?

In disputatione inveniuntur haec:
somnambulus = ὑπνοβάτης
noctambulus = νυκτοβάτης

[Zythophilus]

Fortasse Romani eas res, quas nostro tempore uariis nominibus distinguere solemus, similes uel etiam easdem censuerunt. Is quidem, qui lunaticus uocatur, morbo suo praesertim nocte uexari uidetur.

[Medicus domesticus]

Inveni etiam hoc:
νυκτιπόλος = "bei Nacht umherwandelnd"

[consus]

...νυκτιπόλος = "bei Nacht umherwandelnd"

Sagaciter quidem, mi Medice, investigasti hoc vocabulum, sed quaerendum mihi videtur utrum aptum sit necne; eum enim, qui somno nondum rupto mentis suae non compos ambulare dicitur, quodam modo, hercle!, censeo differre ab eo, qui horis nocturnis quasi Bacchi cornibus ictus insana quidem mente, sed vigilans mediam per urbem vagatur.

[Zythophilus]

Miror quidem, quid eo caseo, cui nomen "Lunatico" est, uorato efficiatur. Si quid miri euenerit - emi enim quantam eius casei copiam Mediolani -, uos certiores faciam.
http://distilleryimage1.s3.amazonaws.co ... 11bb_7.jpg

[consus]

Di meliora..., optime Zythophile! Imagine photographica parum diligenter conspecta, id est primo quasi aspectu, legi "boleto", non "bollata". Boleti verbo deductus sum ad Suillum luteum, qui fungus ab Italis "boleto giallo" appellatur...