LATINITAS VIVA

[ille ego qui]

"immortuus" videtur esse participium verbi immoriendi
mihi aliquando placuit "male mortuus"

[ThomasVulpius]

Salvete, coryphaei!

Propono: [magistrātum sociālem].

Quid vobis videatur, resciscere velim.

Bene valete et respondete!

Thomas vester

[ThomasVulpius]

Salvete, coryphaei!

Prōpōnō [cūrātōrem sociālem].

Quid vobis videatur, resciscere velim.

Bene valete et respondete!

Thomas vester

[ThomasVulpius]

Salvete, coryphaei!

Quomodo haec vox Latine dicatur, prorsus nescio.

Sed ne timeatis, ne in me - senectute confectum - talis res inciderit, eam, quam nominatim appellari fas non est, defectione memoriae affectam esse aperte dicam.

Bene valete neque obliti sitis, quis sim, ne defectione memoriae in "Betreungsverfahren" incidatis!

Thomas vester

[consus]

Salve, Vulpi.
Apta puto esse vocabula tutoris (legitimi*) vel curatoris.
Legere nos oportet quid iuris consulti Romani scripserint. Qui vocabulis utuntur tutoris et curatoris, cf. Codex Iustinianus:

Imperatores Arcadius, Honorius . Tutores vel curatores, mox quam fuerint ordinati, sub praesentia publicarum personarum inventarium sollemniter rerum omnium et instrumentorum facere curabunt.

Gaius hoc scribit (3, 106sqq.):

106. Furiosus nullum negotium gerere potest, quia non intellegit, quid agat. 107. Pupillus omne negotium recte gerit, ut tamen, sicubi tutoris auctoritas necessaria sit, adhibeatur, velut si ipse obligetur; nam alium sibi obligare etiam sine tutoris auctoritate potest. 108. Idem iuris est in feminis, quae in tutela sunt. 109. Sed quod diximus de pupillo, utique de eo verum est, qui iam aliquem intellectum habet; nam infans et qui infanti proximus est non multum a furioso differt, quia huius aetatis pupilli nullum intellectum habent. sed in his pupillis propter utilitatem benignior iuris interpretatio facta est.

__________________________________________________________
* Cf. D. 26, 4, 5 pr.: "Legitimos tutores nemo dat, sed lex XII tabularum fecit tutores."

[consus]

Forsitan tibi, amice spectatissime, placeant verba haec:

actio de tutore instituendo

Cf. Cic. Sest. 111.

[Zythophilus]

Suadeo, ut uerbo tutelae utamur.

[consus]

Nescio an tibi placeant haec verba:

curatores indigentibus adiuvandis

cf. Cic. opt. gen. 19 et off. 2, 52.

[Tiberis]

nonne "arge" (= arbeitsgemeinschaft) est coniunctio quarundam societatum ad opera communiter perficienda?

[Zythophilus]

Duo uerba sunt, quibus Romani, ut res similes uocarent, usi sunt: cura et tutela. Quaerendum igitur esse iudico, utrum de cura alicuius hominis adulti et qui iuris sui iam non est an de tutela loquamur.

[ThomasVulpius]

Nescio an tibi placeant haec verba:

curatores indigentibus adiuvandis

cf. Cic. opt. gen. 19 et off. 2, 52.

Locis inspectis ea, quae proposueras, probavi et enotavi. Gratias! Tu M. Ciceronis genere dicendi optime imbutus esse videris.

[ThomasVulpius]

Duo uerba sunt, quibus Romani, ut res similes uocarent, usi sunt: cura et tutela. Quaerendum igitur esse iudico, utrum de cura alicuius hominis adulti et qui iuris sui iam non est an de tutela loquamur.

Duo in Germāniā hominum genera sunt, quae res suas aut curare non possunt aut a magistratibus vetita sunt: Quorum alterum ipsum advocat tutorem vel curatorem, qui se in rebus cottidianis gerendis adiuvat, alterum res suas administrare non iam posse magistrātūs decrevērunt.

Quomodo haec duo curatorum vel tutorum genera verbis distinguantur, prorsus nescio.

Quam ob rem, quomodo vox "Betreuer" recte dicatur, deliberate et cavete, ne defectione memoriae afficiamini, ne magistratūs curatore vel tutore vobis opus esse decernant!

[ThomasVulpius]

Forsitan tibi, amice spectatissime, placeant verba haec:

actio de tutore instituendo

Cf. Cic. Sest. 111.

Quin "actio tutoris instituendi"?

[consus]

...Quin "actio tutoris instituendi"?

Et hoc placet. - Nescio an nostra aetate potius dicendum sit: "actio de curatore instituendo" vel "actio curatoris instituendi".

[consus]

Vulpio v. c. sal.
Ut rem breviter perstringam sequor Forcellinum (s.v. curator). Praeterea legenda sunt Dig. 26 et 27.
Curator] datur puberi qui sub alterius potestate non est usque ad vigesimum quintum annum, ut eius bona curet, item debili, fatuo, furioso, insane, prodigo.
Tutor] datur impuberi ut eum tueatur.
„Betreuer“] Nostra quidem aetate nonne aptius videtur esse vocabulum curatoris?
Vale.