Se moriens Iesum Benedictus dicit amare
atque optata Dei regna paratus adit.
Pontificem longa mors uita cedere cogit
atque aeterna animae est denique aperta domus.
Sanctorum Elysias gaudens conspicit aulas
cumque suo uiuet nunc sine fine Deo.
Cui diuina prius fuerant uineta colenda,
uinitor hunc secum nunc residere iubet.
Et cum postremo uetus annus abire parabat,
ipse domum moriens hinc Benedictus iit.
Candida templa Petri mox mortua membra tenebunt,
sanctus ubi positus papa Polonus erat,
ut iuste celebrante nouo sollemnia papa
sit tumulo praesens mortuus ipse suo.
Heu! – perit ad Tiberim, quem rusticus edidit Aenus,
claraque deposito corpore ad astra uolat.